Pósthúsið í Mumbai

Það voru ýmsir hlutir sem við höfðum tekið með okkur sem við vorum farin að sjá fljótlega að voru algjör óþarfi. Auka peysa, auka buxur, auka snúrur, of margir bolir, smásjá sem bilaði, lyklar osfrv, svo við ákváðum að taka slatta í poka og senda aftur til íslands.

Pósthúsið í Mumbai var frábær staður. Þar leit allt út eins og maður hefði ímyndað sér að pósthús í bretlandi hefði litið út 1930. Þar að auki virtist allt einnig virka þannig. Það eru engar tölvur (frekar en annarstaðar), öll innréttingin er svona gömul tréinnrétting, maður sá þá bakvið afgreiðsluborðin innsigla umslög með því að bræða eitthvað gumms á þau og svo má ekki gleyma blessaðri myglu- og fúkkalyktinni

Pós(t)að við afgreiðsluborð fyrir bögglapóst – ef böggullinn er stærri en þetta gat, þarf að setja hann í gegnum rimmlana fyrir ofan út í horninu lengst til hægri – þar vantar rúðu í grindina… Indian style

Ef maður ætlar að senda pakka frá Indlandi þá er reglur um það að pakkinn verður að vera saumaður saman í efni og því eru kallar sem standa út á horni fyrir utan pósthúsið og bjóða upp á þá þjónustu. Þeir eru bara með tvinna og efnisafganga sem þeir beita af mikilli lægni og sauma saman hvað sem er eins og hendi sé veifað.

Verið að sauma út böggulinn okkar

[youtube=http://www.youtube.com/watch?v=zdA1wXRcBNo]

Addi kominn með eggið

Heimilisfang skrifað á böggulinn – vona svo að þetta komist til skila